Dagaal khasaare kala duwan geystay ayaa saaka labo maleeshiyo beeleed ku dhex-maray miyiga deggaanka Xarar Xayle oo ugu yaraan 40 KM geesta galbeed kaga beegan degmada Ceelbuur ee gobolka Galgaduud.
Ilo-wareedyo ayaa sheegaya in dagaalkan ay ku dhinteen ugu yaraan 6 qof oo ka tirsan maleeshiyada dirirtay, halka tiro kalena ay ku dhaawacmeen.
Dagaalkan oo sida ay wararku tibaaxayaan la isku adeegsaday hubka noocyadiisa kala duwan ayaa haatan u muuqda mid yar qaboobay.
Maleeshiyaadkan ayaa isku hor-fadhiya goobihii ay ku dagaallameen, waxaana mar walba suuro-gal ah dirir hor leh oo ka dhex-qaraxda, iyadoo ilaa hadda aanay jirin cid kala dhex-gashay.
Labadan maleeshiyo-beeleed ayaa sidoo kale dagaal culusi uu dhex-maray maalinnimadii shalay, kuwaas oo iska dilay ugu yaraan dad gaaraya 4 qof.
Tirada guud ee ku dhimatay dagaalkii shalay galab iyo saaka aroortii hore ka dhacay Xarar Xayle ayaa gaaraysa ugu yaraan 10 qof.
Sida laga war-qabo dagaallada beellaysaysan ayaa aad ugu badan deggaannada ku hoos-jira maamullada daba-dhilifyada ah ee u adeegga danaha shisheeye.
