Ra'iisul wasaarihii dalka Canada Justin Trudeau ayaa si rasmi ah ugu dhawaaqay inuu iska casilay xilkii uu ka hayey dalkaasi.
Shir-jaraa’id oo uu ku qabtay magaalada Ottawa ee caasimadda dalka Canada ayuu ku sheegay inuu iska casilay xilkii Ra’iisul wasaarenimo ee uu dalkaasi ka hayay.
Wuxuu sidoo kale sheegay inuu si kumeel gaar ah xilka u sii heyn doono ilaa xisbiga Leberaalka ee uu ka tirsanaa ay soo xulan doonaan xubintii isaga beddali lahayd.
Justin Trudeau ayaa muddo ku dhow 10 sano hayey xilkaa, waxaana falanqeeyeyaashu sheegayaan in is casillaadiisa ay timid kadib markii cadaadis iyo mucaaradad xooggan ay uga timid xisbul xaakimka dalkaasi xukuma ee uu ka tirsanaa.
Xubnaha xisbigaasi ka tirsan ayaa muddooyinkii lasoo dhaafay dhaliilo u jeediyay siyaasada Ra’iisul wasaaraha is casilay ee uu ku maamulayey dalka Canada.
Sidoo kale, arimaha soo dadajiyey inuu is casilo ustin Trudeau ayaa lagu sheegay kadib markii uu hoos u dhacay taageerada Xisbiga haya talada dalkaasi kaddib markii ra’yi aruurin la sameeyey arrintaasi lagu ogaaday, xillli dalkaasi ay kusoo food leeyihiin doorashooyinka baarlaamka oo loo badinayo in xisbiga talada haya laga adkaan doono.
