Fal aad looga argagaxay oo arxan-darro ah ayaa maanta ka dhacay gudaha magaallada Muqdisho, gaar ahaan degmada Xamar Jajab ee gobolka Banaadir.
Nin dhalinyaro ah oo magaciisa lagu sheegay C/Raxmaan Maxamed Maxamuud ayaa Toorrey nafta kaga jaray xaaskiisa oo lagu magacaabi jiray Foosiya Cali Xaaji Shirwac.
Foosiya ayay wararku tibaaxayaan inay ahayd hooyo haysatay 5 caruur ah, waxaana jirkeeda ka muuqday dhawr Toorray oo lagu dhuftay, sida ay war-fidiyeenka u xaqiijiyeen dad sheegay inay soo arkeen maydkeeda.
Ilo-wareedyo aanu helnay ayaa sheegaya in gacanta lagu soo dhigay gacan-ku-dhiiglihii dilkan geystay, isla markaana xabsiga loo taxaabay.
Ilaa hadda lama oga sababta dhabta ee ninkan ku kalliftay in xaaskiisa uu ajasha dhaafiyo, waxaana socota baaritaanno ku aaddan arrintaasi.
Falkan foosha xun ayaa ku biiraya dhacdooyin sidan oo kale u yax-yax badan oo muddooyinkan dambe ka dhacayey magaallada Muqdisho gaar ahaan iyo guud ahaan dalka Soomaaliya.
Aqoonyahannada ayaa sheegay in werwerka ugu badan ee haysta bulshada Soomaaliyeed uu yahay, cawaaqib-xumada iyo cadaalad-darrada ay had iyo jeer wajahaan dhibbanayaasha ay lasoo dersaan falalkaasi foosha xun ee ay kala kulmaan maamullada daba-dhilifyada ah.
